இமயமாகும் இளமை - இந்திய வரலாற்றில் தடம் பதித்த இளம்பெண்


இந்திய விளையாட்டு வரலாற்றில் ஒரு புதிய சாதனையை நிகழ்த்தியுள்ளார், அஸ்ஸாம் மாநிலத்தைச் சேர்ந்த, 18 வயது நிரம்பிய, ஹீமா தாஸ் (Hima Das) என்ற இளம்பெண். இவர், பின்லாந்தின் டாம்பெரே (Tampere) எனும் நகரில், ஜூலை 10 முதல் 15 முடிய நடைபெற்ற 20 வயதுக்குட்பட்டவர் உலக விளையாட்டுப் போட்டிகளில், 400 மீட்டர் ஓட்டத்தில், தங்கப் பதக்கத்தை வென்றுள்ளார்.

இதுவரை நடைபெற்றுள்ள ஒலிம்பிக், மற்றும், உலகப் போட்டிகளில், ஹாக்கி, டென்னிஸ், பாட்மின்டன், குத்துச்சண்டை, பளு தூக்குதல், துப்பாக்கிச் சுடுதல் போன்ற பிரிவுகளில், தங்கம், வெள்ளி, வெண்கலப் பதக்கங்களை வென்றுள்ளது இந்தியா. ஆனால், தடகள ஒட்டப்பந்தயங்களில், இந்தியா, இதுவரை, ஒருமுறைகூட தங்கம் வென்றதில்லை. அந்தக் குறையை, இளம்பெண் ஹீமா தாஸ் அவர்கள், ஜூலை 12, கடந்த வியாழனன்று நிறைவு செய்தார்.

அஸ்ஸாம் மாநிலத்தின் நாகாவோன் (Nagaon) என்ற ஊரில், ஓர் எளிய குடும்பத்தில் 6வது குழந்தையாகப் பிறந்த ஹீமா அவர்கள், தேசிய அளவிலும், ‘காமன்வெல்த்’ போட்டிகளிலும் பதக்கங்களை வென்றுள்ளார். ஓட்டப் பந்தயங்களில் தன் பயிற்சியைத் துவங்கி இரண்டு ஆண்டுகளே ஆன நிலையில், இளம்பெண் ஹீமா அவர்கள் அடைந்துள்ள முன்னேற்றம் தன்னை வியக்க வைத்துள்ளது என்று, அவரது பயிற்சியாளர் நிப்போன் (Nipon) அவர்கள் கூறியுள்ளார்.

தங்க மகள் ஹீமா தாஸ் அவர்களைப் பற்றிய செய்தி வெளியானதும், இந்தியர்கள், 'கூகுள்' வழியே, இவரைப்பற்றிய விவரங்களைத் தேடினர். அவர்களில் பெரும்பாலானோர் தேடிய விவரம், ஹீமா தாஸ் அவர்களின் சாதி என்ன என்ற விவரம்! சாதி வெறி என்ற நஞ்சை இளம் தலைமுறையினருக்கும் ஊட்டி வளர்க்க முயலும் இந்திய சமுதாயத்தில், இளம்பெண் ஹீமா தாஸ் அவர்கள், இன்னும் பல சிகரங்களை அடையவேண்டும் என்று வாழ்த்துவோம்.

ஆதாரம் : வத்திக்கான் வானொலி


புதியதொரு துவக்கத்திற்கு தேர்தல்கள் வழிவகுக்கட்டும்


ஜூலை,17,2018. போஸ்னியா-ஹெர்சகொவினா (Bosnia-Herzegovina) நாட்டு மக்கள் தங்கள் வாக்களிக்கும் உரிமையை செயல்படுத்தும் நோக்கத்தில் தங்கள் பெயர்களை பதிவுச் செய்ய வேண்டும், ஏனெனில் வாக்களிப்பது ஒவ்வொருவரின் கடமை என அழைப்பு விடுத்துள்ளனர் அந்நாட்டு ஆயர்கள்.

இம்மாதம் 14ம் தேதி Banja Luka நகரில் தங்கள் ஆண்டு நிறையமர்வுக் கூட்டத்தை முடித்து, அறிக்கை ஒன்றை வெளியிட்ட ஆயர்கள், இவ்வாண்டு அக்டோபர் 7ம் தேதி, போஸ்னியா ஹெர்சகொவினாவில் இடம்பெற உள்ள தேர்தலில் வாக்களிக்க வேண்டிய மக்களின் கடமையை அதில் வலியுறுத்தியுள்ளனர்.

தேர்தல் என்பது ஒரு புது துவக்கத்தைக் குறிப்பது என்பதை சுட்டிக்காட்டியுள்ள ஆயர்கள், கருத்துப் பரிமாற்றங்கள், மக்களிடையே வேறுபட்ட கலாச்சாரங்களையும், மொழிகளையும், மதங்களையும் மதித்தல் போன்றவற்றை உள்ளடக்கிய ஒரு சூழலை உருவாக்கும் நோக்கத்தில் தேர்தல் பங்களிப்பு இருக்கவேண்டும் எனவும் அதில் விண்ணப்பித்துள்ளனர்.

மற்றவர் அல்லது மற்ற இனத்தவரின் துன்பங்களிலிருந்து ஒருவரின் மகிழ்ச்சியை கட்டியெழுப்ப முடியாது என்ற அடிப்படை உண்மையை மனதில் கொண்டவர்களாக, நாட்டில் வாழும் அனைத்து இனத்தவரின் பங்களிப்பும் தேர்தலில் இருக்க வேண்டும் என்பது உறுதிச் செய்யப்பட வேண்டும் எனவும், ஆயர்கள், தங்கள் அறிக்கையில் அழைப்பு விடுத்துள்ளனர்.

ஆதாரம் : வத்திக்கான் செய்திகள்


"நெல்சன் மண்டேலாவின் சிறை மடல்கள்" நூல் வெளியீடு


ஜூலை,18,2018. 1918ம் ஆண்டு, ஜூலை 18ம் தேதி பிறந்த நெல்சன் மண்டேலா அவர்கள் பிறந்தநாளின் முதல் நூற்றாண்டு, ஜூலை 18 இப்புதனன்று சிறப்பிக்கப்படும் வேளையில், "நெல்சன் மண்டேலாவின் சிறை மடல்கள்" என்று நூல் இப்புதனன்று வெளியானது.

அமெரிக்க ஐக்கிய நாட்டின் Liveright அறக்கட்டளையால் வெளியிடப்பட்டுள்ள இந்நூலில், நெல்சன் மண்டேலா அவர்கள் சிறையில் எழுதி, இதுவரை வெளிவராத 255 கடிதங்கள் இடம்பெற்றுள்ளன என்று ICN கத்தோலிக்கச் செய்தி கூறுகிறது.

1962ம் ஆண்டு தன் 44வது வயதில் தென் ஆப்ரிக்க அரசால் கைது செய்யப்பட்ட நெல்சன் மண்டேலா அவர்கள், அடுத்த 27 ஆண்டுகள் சிறையில் அடைக்கப்பட்டிருந்தார்.

அவர் சிறையில் இருந்த 10,052 நாட்கள், சிறை அதிகாரிகளுக்கு, அரசு அதிகாரிகளுக்கு, மற்றும், குறிப்பாக, தன் மனைவி, வின்னி மண்டேலா அவர்களுக்கும், தனது பிள்ளைகளுக்கும் எழுதிய கடிதங்கள் இந்நூலில் இடம்பெற்றுள்ளன.

Sahm Venter என்பவரால் மிக கவனமாகத் தொகுக்கப்பட்டுள்ள இக்கடிதங்கள் அடங்கிய நூலுக்கு, நெல்சன் மண்டேலா அவர்களின் பேத்தி, Zamaswazi Dlamini-Mandela அவர்கள் அணிந்துரை வழங்கியுள்ளார்.

தென் ஆப்ரிக்கா, நிறைவேறியிலிருந்து விடுதலையாகி, ஒரு குடியரசாக உருவாக காரணமாகவும், பின்னர் அந்நாட்டின் அரசுத்தலைவராகவும் விளங்கிய நெல்சன் மண்டேலா அவர்களின் பிறந்தநாள் நூற்றாண்டு கொண்டாட்டங்கள், உலகின் பல நாடுகளில் கொண்டாடப்பட்டன.

ஆதாரம் : ICN / வத்திக்கான் செய்திகள்